Është padyshim ndër këngëtaret më te dashura për të gjithë shqiptarët.
Eli Fara mbetet një ikonë në skenën e këngës shqiptare, por pasioni i saj nuk është vetëm kënga por edhe gatimi.
AgroWeb.org ju sjell më poshtë recetën e përgatitur nga Eli Fara të lakrorit me qepë e domate.
Një recetë tipike tradicionale, që këngëtarja e njohur e ka rrëfyer hap pas hapi në emisionin ‘Kush Vjen Për Drekë’ në Tv Klan.
Eli Fara tregon se ka mësuar të gatuajë që e vogël e deri sot kuzhina mbetet pasion i saj.
“E gjej kohën përherë kohën për të gatuar sepse kuzhinën unë e kam pasion. Eksperimentoj, më pëlqen edhe të sajoj një recetë shpejt e shpejt. Kam mësuar të gatuaj që e vogël.
Duke qenë një familje me shumë fëmijë, prindërit në punë, jemi mësuar që të vogla të shohim se si gatuhej, si fillim me gatime të vogla. Sigurisht që në Korçë, amvisat kanë traditë hapjen e petëve. Të jesh vajzë nga Korça duhet me patjetër të hapësh petë ” thotë Eli Fara.
Ndiqni më poshtë, këshillat e Eli Farës se si të përgatisni sipas recetës së saj lakrorin me domate.
Përbërësit
500 gr Miell
Niseshte (për pudrosjen e petëve)
3 kokrra qepë
3 kokrra domate
Kripë
Vaj Ulliri
250 ml ujë i vakët
Përgatitja
Si fillim, grini qepë shumë imët.
Më pas, pastroni domatet nga lëkura dhe grijini imët edhe ato gjithashtu.
Vendosni një tigan në zjarr, shtoni vaj ulliri dhe shtoni qepët e grira imët.
Sapo qepët të jenë bërë transparente, shtoni domatet e grira,
Kaurdisni të gjitha bashkë, shtoni kripë dhe lëreni në zjarr derisa uji i domateve të shterojë dhe masa të ketë marrë formën e salcës.
Largojeni nga zjarri dhe lëreni mënjanë.
Ndërkohë, nisni me përgatitjen e brumit.
Si një amvisë e vërtetë korçare, Eli Fara këshillon se mielli para se të përgatitet si brumë duhet të sitet.
Pasi ta sitni, shtoni pak kripë, dhe nisni duke e punuar duke shtuar ngadalë ujë të vakët.
Punojeni me duar derisa brumi të marrë një masë kompakte dhe të njëtrajtshme.
Më pas, brumin e përftuar lyejeni më pak vaj ulliri dhe ndajeni në 10 toptha të vegjël.
Secilin prej topthave hapeni në formën e një pete të vogël sa pëllëmba e dorës dhe secilën prej petëve të hapura lyejeni me vaj ulliri.
Nisni më përgatitjen e dy petëve duke përdorur pluhurosjen e tyre me niseshte në mënyrë që të mos ngjiten dhe hapen shpejt.
Vendosni njëra pas tjetrës pesë e nga pesë petët e vogla që keni hapur.
Hapni pesë petët e para të vogla që keni vendosur një mbi një, në një petë të vetme.
Merrni një tepsi, lyejeni me vaj ulliri, shtroni aty petën e parë që keni hapur,
Shtoni mbi petë salcën e përftuar me domate dhe qepë dhe vijoni me hapjen e petës së dytë me pesë petat e vogla që keni vendosur një mbi një.
Vendosni petën e dytë mbi petën me salcën e domates me qepë dhe bashkoni anët e dy petëve duke i kthyer nga brenda, në mënyrë që masa me qepë dhe domate të mos dalë nga petët.
Piqeni në furrë me temperaturë maksimale për 30 – 40 minuta derisa sipërfaqja e lakrorit të ketë marrë pamjen e mrekullueshme të pjekjes. AgroWeb.org
