Vildan Tufi, trajneri shkodran i mirënjohur i atletikës, është ndarë nga jeta në moshën 75-vjeçare. Profesori dhe atleti i mirënjohur vuante prej kohësh nga një sëmundje e rëndë dhe fatkeqësisht nuk ka fituar dot betejën.
Kryebashkikja e Shkodrës, Voltana Ademi, ka shprehur ngushëllimet për ndarjen nga jeta të Profesorit Tufi.
“Një humbje e madhe për sportin shkodran e shqiptar, për atletikën shkodrane e shqiptare. Trajner i palodhur i kampionëve, edukator shembullor dhe prind e familjar si ai. E prisnim të gjithë që të kthehej në pistat e atletikës, e prisnim që të fitonte betejen me sëmundjen e rëndë! Fatkeqësisht nuk ia doli, për tu larguar nga kjo jetë vetëm fizikisht.
Profesor Vildan Tufi do te jetojë përmes kampionëve të panumërt që stërviti, titujve e medaljeve që përmes punës së tij, i solli në Shkodër. Pushofsh në paqe Profesor Vili! Do të na mungosh”, shprehet kryetarja e Bashkisë së Shkodrës.
Vildan Tufi ishte vlerësuar pak muaj më parë nga Presidenti Ilir Meta me titullin “Mjeshtër i Madh”.
