Mbrëmja e sotme në “Opinion” i ishte dedikuar Vespës. Megjithatë një prej të ftuarve erdhi me “motrën” e re të Vespës, një Piaggio. Dhe për këtë, Enton Jubani tregoi arsyet.
“Unë sot kam bërë 4 orë me ardh nga Shkodra në Tiranë. E kam në kohën kur e bëja me Vespa në rrugën e vjetër. Sot ishte rruga e re, por trafik i madh. Kështu që kur shkova tek Vespa dhe kisha nja një muaj e ca që nuk e përdor, Vespa nuk m’u ndez dhe gjithë Vespistët e dinë këtë se Vespa është si një qenie njerëzore që po nuk u kujdese me të ta kthen në një lloj mënyre”, tha Jubani.
Ai u shpreh se ka qenë 13-vjeç kur babai i tij mori një Vespa. Aq shumë ishte i apasionuar pas saj saqë tregoi se e puthte para se të flinte gjumë.
“Ishte e bardhë. Një Vespa që e merrsha, i hypsha në shtëpi dhe e puthsha para se me fjet. Aq shumë ishim të apasionuar pas Vespës”, tha Jubani./tvklan.al
