Floriana Garo, ka folur për përfshirjen e saj në politikë dhe debatet që ka me vjehrrën e saj, pse ka vendosur të mbështesë ish kryeministrin Sali Berisha.
Në një intervistë televizive, ajo është shprehur se ka qenë bashkëshorti i saj, i cili përveçse suport ka qenë edhe nxitës i madh që ajo ta vazhdojë këtë rrugëtim.
Ndryshe mendon nëna e bashkëshortit të saj, e cila siç ajo tregon nuk ka qenë mbështetëse për shkak se ndajnë pikëpamje të ndryshme në politikë.
“Nuk ishte propozim, unë jam ofruar për të kontribuar në Partinë Demokratike shumë natyrshëm. Pastaj kur më erdhi pranimi i ofertës, propozimi, mendova që ishte për t’u bërë. Bashkëshorti ka qenë një suport shumë i madh, një nxitës do thosha.
Po, vjehrra nuk ka qenë mbështetëse. Nuk ka qenë mbështetëse që të mbështesja Sali Berishën si figurë politike. Kemi shumë ndryshime në pikëpamje. Ajo ka qenë vetë e përfshirë në politikë dhe mënyra se si ne kemi dashur që gjithmonë ta shohim Shqipërinë të realizuar edhe ajo në mënyrën e saj, unë në mënyrën time, me një dëshirë patriotike, të mirëfilltë për të kontribuar për vendin tonë dhe për të dhënë këtë model, por ajo e shikon ndryshe nga unë”, u shpreh ajo.
Floriana Garo theksoi se kjo shpesh është bërë shkak për debate mes tyre.
“Ne kemi një marrëdhënie të hapur me njëra-tjetrën, një marrëdhënie mes shoqes do thosha sepse dhe ajo është shumë rinore në pamje edhe në mendime edhe në veprime, kështu që ka qenë më shumë fërkim që do ishte mes mikeshave, ku ajo mendon që jo edhe pse thotë që di më shumë se ty, jam më e madhe sesa ty, duhet të më dëgjosh, por në këtë rast nuk e kam dëgjuar. Tani unë vazhdoj të jem në politikë. Nuk di ta them, secili ka pikëpamjet e veta, ke tensione të vogla, por unë kam arritur gjithmonë ta sheshoj, edhe ajo. Kur i them stop, nuk do flasim për këtë gjë dhe nuk flasim”, deklaroi Floriana Garo.
