Për shumë njerëz parfumet janë shumë të rëndësishme, e sidomos për vajzat pasi është një ndër produktet që nuk mungon asnjëherë në çantë.
Aroma e parfumit është e parezistueshme dhe të gjithë dëshirojnë që era e tij të zgjasë për gjithë ditën. Ndodh që edhe pse shpenzojmë shuma të mëdha parash, aroma zhduket pas disa orësh.
Kjo nuk ndodh për faj të cilësisë së parfumit, por për shkak të mënyrës së gabuar që e hedhim.
Njohuritë nuk nevojiten vetëm për sasinë, duhet të dish ku ta sprucosh për të marrë impaktin më të madh dhe si ta aplikosh që të zgjasë gjithë ditën.
Aplikoje në lëkurë të hidratuar
Koha më e mirë për të aplikuar parfumin, ose çdo lloj produkti me atë qëllim, është menjëherë pas dushit. Jo vetëm që lëkura është e pastër, por është gjithashtu e ngrohtë dhe e lagësht duke krijuar kushtet optimale për të thithur plotësisht çdo produkt, përfshirë parfumin. Nëse nuk mund të bësh dush në atë kohë, apliko një locion pa aromë fillimisht. Sa më e hidratuar të jetë lëkura, aq më gjatë do të qëndrojë aroma.
Mos e shkatërro aromën
Shmang ndryshimin aksidental të aromës duke mos e tepruar me kremra, apo detergjent trupi me aromë. Ose edhe më mirë, mos i përdor të aromatizuar. Ata mund ta shndërrojnë parfumin tënd ose shumë të ëmbël, ose shumë të fortë, madje edhe të thartë. Mos përdor produkte të tjera të aromatizuara dhe parfumi do ta bëjë rolin e tij shumë mirë.
Hidhe në anën e brendshme të kyçeve të duarve
Këtë e dimë të gjithë, por ndoshta disa nga ne nuk e kanë menduar arsyen. Sprucimi i parfumit në kyçe dhe në qafë nuk është bërë një traditë bukurie vetëm për faktin që zonjat duken shumë elegante kur e bëjnë atë veprim. Qafa, kyçet, pjesa e pasme e gjunjëve dhe zonat e tjera të pulseve nxjerrin më shumë nxehtësi sesa pjesët e tjera të trupit dhe kjo nxehtësi aktivizon dhe maksimizon aromën.
Thithe, por mos e fërko
Duhet të mos e fërkosh parfumin për dy arsye. E para, po të fërkosh pulset, mund të mbysësh nuancat e sipërme të aromës, që nuhat në pesë minutat e para. E dyta ky veprim përzien parfumin me yndyrën natyrale të lëkurës, që mund të ndryshojë aromën e tij.
Nuk ka një sasi magjike për hedhjen e parfumit, por rregulli është dy sprucime në lëkurë janë gjithmonë mjaftueshëm, madje ndonjëherë janë shumë.
Para se të përdorësh një parfum jashtë, testoje në shtëpi. Hidh një spruco mbi kyçin e dorës duke e thithur me kyçin tjetër dhe kontrollo sa i fortë është. Pastaj, kontrolloje çdo 2 orë për të kuptuar sa zgjat.
