Lezhjanët ishin motivuar shumë për të fituar ndaj Vllaznisë por në fund nuk ia dolën. Atyre nuk “u bëri derman” as lënia pushim e disa titullarëve në ndeshjen e kupës dhe as grumbullimi një ditë para ndeshjes.
I pyetur në lidhje me atë paraqitje jo të mirë ndaj skuadrës shkodrane, trajneri i Besëlidhjes Ndriçim Kashami është shprehur: “Ishim përgatitur për ta interpretuar krejt ndryshe ndeshjen por në fushën e lojës skuadra nuk paraqiti asgjë nga vlerat e saj të vërteta.
Mesa duket, Vllaznia na mundi me peshën e fanellës së rëndë që ka dhe me emrat e lojtarëve me përvojë që janë pjesë e saj. Ky është ndryshimi në mes dy ekipeve dhe që u reflektua në fushë”.
Ajo që mund të thotë Kashami është mëse e vërtetë megjithatë, nuk është justifikim.
Me humbjen e djeshme lezhjanët e shohin veten larg pretendimeve dhe duket se edhe këtë sezon nuk do të arrijnë të realizojnë objektivin e tyre për t’u ngjitur në Superligë.
© shkodrasport.com
