Ndeshja e djeshme në mes Veleçikut dhe Vllaznisë ka patur edhe një moment interesant që shkaktoi polemika por edhe të qeshura në fakt.
Ka qenë minuta e 37-të e takimit kur pas një pasimi të Hajdarit, braziliani Junior gjuan në drejtim të portës së Veleçikut dhe topi që duket se përfundon në rrjetën e jashtme, papritur shihet brenda rrjetës së portës.
Për momentin askush nuk e mori vesh nëse vërtetë ishte gol apo jo. Futbollistët e Vllaznisë nuk është se u gëzuan shumë dhe po ashtu edhe vendimi i arbitrit Sino nuk është shumë i qartë sepse ai për momentin bën me shenjë nga mesi i fushës por nuk merret vesh nëse ka akorduar gol apo rivënie fundore.
Megjithatë pas një sinjali të futbollistëve të Veleçikut, Sino kthehet tek porta dhe aty konstatohet një çarje e rrjetës në pjesën anësore. Lojtarët e Vllaznisë ndërkohë afron dhe duket se kërkojnë nga arbitri ta japë gol.
Kjo krijon njëfarë kaosi për rreth një minutë por çdo gjë sqarohet sepse nuk kishim të bënim me gol.
