“Kulla e Inglizit’ në Shkodër, një ndër objektet e rralla të trashëgimisë kulturore të këtij qyteti, u shëndrrua në mikpritëse të 60 fotografive të fotografit Petrit Imeraj.
Shkrepjet e aparatit të tij kishin pasur si fokus florën, faunën dhe karakteristikat e relievit malor të Alpeve Shqiptare, nën moton e frymëzuar dhe nga zhvillimet e fundit në luginën e Valbonës: “Nëse nuk i duam të paktën të mos i shkatërrojmë Alpet”
“Këto zona janë harruar nga vetë turistët shqiptarë” – tregon fotografi – “Dikur ishin të diskriminuara nga regjimi komunist, por kurdoherë kanë qenë të preferuara dhe të vlerësuara nga të huajt. Natyra është e bukur por nëse abuzon me të, atëhere bëhet e rrezikshme” – vijon më tej z.Imeraj.
Kjo ekspozitë tërhoqi vëmendjen edhe të dhjetra vizitorëve të huaj.
“Shqipëria ka mrekulli natyrore- tregon një turist gjerman- “ Unë kam vizituar Thethin, Komanin, Shalen, Valbonën dhe do të rikthehem vitin tjetër për të vizituar Currajn e Epër në Tropojë.
Në Valbonë, vura re se hidroncentrali ishte drejt përfundimit. Gjatë rrugës mësova se hidrocentrale do të ndërtohen edhe në Theth e Shalë. Sa keq ! Mos ndërhyni në natyrë! Shqipëria mund të fitojë më shumë me turizëm se sa me ato 2 apo 3 hidrocentrale. Duajeni natyren!” – shprehet turisti gjerman.
Ekspozita ishte pjesë e programit Senior II, i cili zbatohet nga Qendra Rajonale Mjedisore “REC” në Shqipëri dhe financohet nga Ambasada Suedeze në Tiranë.
