Teksa kanë kaluar 24 orë nga takimi me ambasadorin e OSBE-së, Bernard Borchardt, kryetarja e bashkisë së Shkodrës, Voltana Ademi, ka shprehur vendosmërinë për të mos ia lënë vendin kryebashkiakut socialist të dalë nga zgjedhjet e 30 qershorit.

Ajo thotë se është e vendosur të mos bëjë as një hap pas. Kyebashkiakja shton se shkodranët janë të vendosur të mbrojnë vlerat për të cilat i’u vunë përballë për 45 vite diktaturës.

Sipas saj, krimi qeveritar e ka marrë dhe do ta marrë çdo herë përgjigjen nga Shkodra e qytetarët e saj.

Me vendosmëri Voltana Ademi shton se do të jetë rrugëtim jo i lehtë, por është e vetmja rrugë për të rikthyer vlerat tek të cilat besojnë shumica e shqiptarëve.

Ademi ka folur gjerë e gjatë dje me Borchardt për krizën politike dhe në veçanti, situatën e krijuar pas 30 Qershorit, por dha pak detaje për mediat.

Megjithatë, në fotografitë që ka publikuar bashkia e Shkodrës, kryetarja shfaqet e qeshur dhe mesazhin e vet sot e ka ilustruar me njërën prej fotove të atij takimi.

Ajo shkruan sot në Facebook:

Asnjë hap pas! Shkodranët janë të vendosur të mbrojnë vlerat për të cilat i’u vunë përballë për 45 vite diktaturës. Shkodranët janë të bindur në rrugën e tyre për rikthimin e vendit në shinat e demokracisë.

Shkodranët e kanë të qartë se rreziku vjen nga banda kriminale që ka uzurpuar parlamentin, qeverinë dhe po kërkon të pushtojë edhe qeverisjen vendore.
“30 qershori” ishte referendumi popullor që i tregoi klikës në pushtetin e uzurpuar se është pakicë, që i tregoi edhe mbarë botës se shumica e shqiptarëve refuzojnë partinë – shtet, monizmin pas 30 viteve pluralizëm.

Shkodra ia dha përgjigjen juntës anti- kushtetuese të Edi Ramës, me një braktisje të pashembullt, nga të majtë e të djathtë. Me gjithë manipulimet dhe terrorin mbi administratën shtetërore.

Shkodra është e shkodranëve dhe do të jetë gjithmonë e shkodranëve. Krimi qeveritar e ka marrë dhe do ta marrë çdo herë përgjigjen nga Shkodra e qytetarët e saj.
Shkodra nuk mund të lejojë të qeveriset nga banda e inkriminuar uzurpatore, 6 përqindëshat nuk do të mund marrin peng Shkodrën.

Do të jetë rrugëtim jo i lehtë, por është e vetmja rrugë për të rikthyer vlerat tek të cilat besojnë shumica e shqiptarëve. Lufta me krimin shtetëror është e vështirë dhe ne shkodranët e dimë mirë! Me vendosmëri, sepse s’ka rrugë tjetër!”