Yll Manjani ka bërë një deklaratë të fortë pas fjalëve në kuvend ditën e djeshme ku një deputet tha se votat po blihen fillimisht prej pensionistëve nëpër lagje.
Ai mendon se sistemi aktual zgjedhor është baza e korrupsionit në vend dhe për të luftuar këtë gjë ai kërkon bashkimin e shqiptarëve për pjesëmarrje masive në zgjedhje. Ish-ministri i Drejtësisë mendon se vëtëm kështu mund të luftohet ky problem i madh i ynë. Sakaq, ja deklarata e plotë e tij:
Që të kuptohemi.
Hajduti më i madh i zgjedhjeve është sistemi zgjedhor. Blerja e votës është një devijim i rëndë i konceptit të demokracisë, por sistemi është hajduti më i madh.
-Copëzimi i pabarabartë i votës në territor, dmth ndarja e saj sipas qarqeve me numër të ndryshëm votash dhe mandatesh;
– loja me numrat tek e çift të mandateve në qarqe,
– metoda D’Hond e përllogaritjes për ndarjen e mandateve;
dhe
– ndalimi arbitrar (në mes të garës dhe pa konsensus) i garimit me koalicion listash;
Janë elementët e sistemit zgjedhor që legjitimojnë vjedhjen spektakolare të zgjedhjeve.
Këto elementë, në sisteme të ndryshme elektorale, njihen si bonuse për partinë e parë. Ndërsa në ligjin tonë këto janë shkruar për të legjitimuar VJEDHJEN e mandateve pa vota.
Pavarësisht se nuk të voton 50%+1e popullit, me këto elementë partia e parë sundon e vetme, sepse merr shumicën e vendeve në Parlament. Ja pra përse themi se sistemi në efekt është mazhoritar.
Kështu që partisë moniste që sundon i duhet vetëm të mbledhë vota sa për të qenë parti e parë dhe të mbajë kundërshtarët të përçarë.
Mjafton vetëm kaq dhe partia e parë i merr të gjitha e vetme!!! Madje mund të rrijë gjatë kështu…
Ne të tjerëve na rroftë demokracia dhe vota e lirë!!!
Prandaj duhet një sjellje popullore e fortë ndaj kësaj situate, sepse nuk është vetëm heqja e Ramës, por e MONIZMIT.
Vetëm me pjesmarrje masive ulen ndjeshëm efektet e vjedhjes ligjore që do të bëjë monizmi. Vetëm kështu vota merr vlerën reale dhe jep efektet e duhura.
Nuk ka rrugë tjetër, përveç PJESMARRJES”.
