Shqiponja Marku ka humbur bashkëshortin e saj 14 vite më parë në një aksident në zonën e Kamzës, pasi një makinë ia përplasi për vdekje.
Në një intervistë që ka dhënë për emisionin Uniko nga Spartak Koka në Klan Plus, Shqiponja Marku tregon se ajo e mësoi e fundit për humbjen e bashkëshortit, pasi në atë periudhë ka qenë rreth 7 muajshe shtatzënë me fëmijën e dytë.
Shqiponja Marku: Unë jam Shqiponja Marku, jam me origjinë nga Puka, kam dy kalamaj. Më 7 Prill 2009, bashkëshorti im u aksidentua për vdekje në rrugën Kamzë-Institut. Jetonim përballë me qira.
Spartak Koka: Çfarë ka ndodhur atë ditë?
Shqiponja Marku: Atë ditë si çdo ditë tjetër bashkëshorti im u nis për punë, kishte një lokal po me qira në Kamzë. Atë ditë do vinte pak më herët se ditët e tjera në shtëpi sepse kishim probleme me tubacionet e shtëpisë. 20 minuta përpara se të linte punën, më mori në telefon më tha po le punën po vij për shtëpi. Ndërkohë që ai nuk erdhi kurrë, u përplas edhe ndërkohë që fillova të bëhesha merak sepse nuk po më ngrinte telefonin.
Spartak Koka: Sa ishte ora?
Shqiponja Marku: Ka qenë 6 pasdite, ka qenë ditë.
Spartak Koka: Kur e mësove që ishte aksidentuar për vdekje?
Shqiponja Marku: Në fakt unë e kam marrë vesh e fundit sepse ma kanë fshehur ngaqë isha shtatzënë 7 muajshe dhe ma kanë mbajtur të fshehur deri sa ai ka vdekur. Unë i shihja njerëzit, shihja rrëmujën, shihja ambulancat nga shtëpi.
Spartak Koka: Nuk të shkoi mendja për ndonjë gjë të keqe?
Shqiponja Marku: Jo nuk më shkoi mendja. Thjesht i bija telefonit, ai s’ma ngrinte, por jo që ishte përplasur bashkëshorti im. Kisha vajzën 2 vjeç e gjysmë edhe shtatzënë me djalin, isha 6 muaj e pak.
Spartak Koka: Pra ai nuk ka arritur ta njohë djalin e tij dhe djalin të njohë të atin.
Shqiponja Marku: Jo. Për fatin e tij të keq dhe të fëmijëve të mi jo.
Shqiponja Marku kërkon drejtësi për bashkëshortin e saj të ndjerë, pasi ajo pretendon se shoferi i makinës që e përplasi për vdekje e ka shfrytëzuar këtë rast për t’u larguar me azil në Austri dhe se ngjarja është manipuluar.
